Boekwinkels

An de Kruusstraot in Assen is gien tekört an boekenwinkels. Tegenover Van der Kuijl zit de Bruna en Van der Veen, wat verderop zit Van der Velde. Bij van der Kuijl, die zölf in de winkel stiet, is veuran in de midden van de winkel een grote Drèentse boekenplaank inricht. Van der Kuijl is een echte kenner van Drèentse schrieverij. Hij vertelde, dat Roel Reijntjes een paar maol in de winkel west was um een boek te presenteren. Op de plaank ziew boeken van Peter van der Velde, Abel Darwinkel, Ria Westerhuis um maor een paar te numen. Der stiet ok nog een uutgave van Bart Doedens over Albert Steenbergen. Die ziej niet zo vaak. Over de verkoop van de Drèentse boeken is Van der Kuijl minder tevereden, maor het heurt der wal bij, zeg Van der Kuijl. Het boekie met Drentse Wijsheden, verzameld deur Roel Reijntjes is de bestseller in Assen.

Wij doen beslist onze best om het Drents in de winkel te promoten en te verkopen!

Bij Riemer Barth in Möppelt kuj terecht aj Drèentse schrieverij zuukt. Natuurlijk grote namen as Roel Reijntjes en Marga Kool, maor ok Suze Sanders, Martin Koster en Ria Westerhuis. Een mooie winkel, aordig volk en een flinke ofdieling met schrieverij en cultuur.

Drèentse schrieverij zunder Boekhandel Pet in Hoogeveen is haost niet veurstelbaar. Claas Pet begun zien boekwinkel al in 1857 en in de loop van de tied haar Pet zien eigen imperium in Hoogeveen: een drukkerij, een uutgeverij en in 1860 kwam het Hoogeveensch Nieuws- en Advertentieblad op de markt, dat weur in 1874 de Hoogeveensche Courant. Wat later kwam de Beiler Courant. Pet was ok de uutgever van de Clapper der Calkoens van Albert Steenbergen, ien van de eerste hoogtepunten (en grootste schandalen) van de Drèentse schrieverij. Ondanks de lange geschiedenis van Pet waren wij wat teleursteld toen wij in de winkel waren. Der was weinig schrieverij te vinden, wal een hiel stapeltie boeken over de geschiedenis van Hoogeveen en umstreken. Jammer, want Pet is wal actief met lezingen en de poezieweek. Wij hadden wat mèer verwacht.

In Coevern waren wij op zuuk naor Drèentse schrieverij. Twee boekwinkels hew vunden, de Primera in de Kerkstraote en de Readshop in de Friesestraote. Het vul jammergenog niet met. In de Primera zag het er op ’t eerste gezicht goed uut. Aj de winkel binnenkomt, ziej metien een kast met ‘Regionaal’. Maor ja, dat har met boeken niks van doen. Het waren een hiele stapel puzzels van 1000 stukkies. Achter in de winkel was nog een hoekie met schrieverij: ien bundel van Ria Westerhuis. Veur de rest wat boeken over hunebedden. Bij de Readshop zag’t er wat beter uut. Wij vreugen de dame achter de teunbaank naor schrieverij: ‘Achter in de winkel in de linkerhoek. Daor achter die duzen, daor moej even umhen lopen’, zee ze. Wij vunden een boek over Keunegin Juliana (die was ja ok Keunegin van Drenthe). Maor ok schrievers as Marga Zwiggelaar, Gerard Nijenhuis, Anne Doornbos. En, verrassing, een hiele stapel van Uutgeverij Ter Verpozing uut Peize. Mooi!