De uutgave van Underweg over Schipbörg, de Kymmelsbarg en Suze Sanders
Met Suze Sanders in Schipbörg
Suze Sanders bereisde in 2014 de Kymmelsbarg en het Drouwenerzaand en maakte twee gedichten veur het project IJstijden, zichtbaar in het landschap. Wat hef ze zien? Wat hef ze vunden? De lèeste iestied is al 150.000 jaor leden, tot 10.000 jaor leden was de Kymmelsbarg een soort poollaandschap. Siberië – een kale vlakte met wat strubberij, gres, mos. Veul ies, snei en bevreuren grond, al was de eigenlijke iestied wal achter de rugge.
Wat kuj daor nog vinden, nao zo’n lange tied? Niet veul, zuj denken. En toch: bijna alles wat aj zien kunt, hef direct met de iestied van doen. ’t Zaand, de stuwwallen, de stienen, de hunebedden, de stroomdallen. Het ies hef het laand vörm geven, zaand opstuwd, stroomdallen uutschuurd, vlinten achterlaoten. Zunder iestied was de Kymmelsbarg der niet west. Maor veur een kuunstenaar, veur een dichter, is dat wat aj niet kunt zien misschien wal belangrieker. Veural as die dichter Suze Sanders is.
Wij bint neisgierig en wilt graag weten wat Suze Sanders op de Kymmelsbarg zien hef. Wat hebt Kymmelsbarg, iestied en die treurige, melancholische stemming van de tekst met mekaar van doen? Waor lig de verbinding? Die melancholie is ja niet ‘gewoon’ een gevuul – der möt mèer wezen.
Op de video hierunder draagt Suze Sanders heur gedicht Op de Kymmelsbarg veur.
Dus: op tjak! Het gedicht van Suze Sanders in de jasbuus, underweg naor Schipbörg. Kieken, kuiern en lezen!
as het ies mij weer haolt
Suze Sanders op de Kymmelsbarg
Het Drentse Boek, Beilen
https://www.huusvandetaol.nl
Veurdat Suze Sanders in 1986 begun te schrieven haar ze al een halve wèreldreis en een half leven achter de rugge: Goes, Rotterdam, Pijnacker, Oslo, Grunning. Pedagogische academie, secretaresse, studie Noorse taol en literatuur. Dizze reis beschref Suze Sanders in ’t gedicht tussen goes en grunning uut 1996. Een reis waor de letters, woorden, zinnen, en gedachten wal diel van waren, maor niet blieven wollen. Het gedicht kuj lezen in de bundel een zeum van locht (1996). Diel van de bundel Langs de vloedlien van de winter (2006) is een CD. Suze Sanders les op die CD een keuze uut heur wark. Beide uutgaves kuj bestellen bij Het Drentse Boek in Beilen of vanzölf ok kopen in de boekenwinkel..